Canalblog
Editer l'article Suivre ce blog Administration + Créer mon blog
Publicité
AKEM asbl * Association Kasayienne d'Entre-aide Mutuelle (Tél.: +32498 685 870 / +32497 316 146)
2 février 2010

KASALA KA MU KASAYI

cartecongo

Kasayi            wa tshintenta ne tubanda-banda,
                        wa mpata ne wa metu manyi,

                        wa Mulundu wa kamueshi ne tupuka-puka

Kasayi            ditunga dia mua kuenda mazengu ne kununka muenyi !

                        wa kutemba ku bantu, kua benda ne mu bimenga.

                        Luabanya makalenga ukadi udidila nkuasa!

Wa mu Kasayi se ngua kuvuala tshia N’Kashama ne tshia N’tambua wa boya!

                        Mukalenga kaya kufuila makalenga ne bakalenga nenda.

                        Muana wa mu Kasayi kayakudia dikonda diiba, katu wa

                        buela nzubu wa mutoyi anyi wa tshinyangu.

Mona muetu mudi Lubi ibidi: Lubi wa mpata na wa bitùùta.

                        Mona mpata mualaba wa Dimbelenga wa kuipata ntenga,

                        udi tubùùbu tupita meshi a mangaya ku muenyi!

Muetu mudi nvunda ujukila mu Luputa ne mu Ngadanjika, mu Katanda ne mu

                        Tshilengi, Miabi ya Kalunda ne mu Kamuanga, tshipepela nyau

                        wikala mu Malandi.

Muetu mudi Kasayi munena ne Lulua wa bidila wa masangu manyi, Lubilanji ne

                        Nsakulu , ne tusulu tulenga: Kaja Mukongo, Mujila, Bondayi ne

                        Mulunguyi, tusulu tonso katutyi mua kubala kumana.

Muetu mudi mpokolu milenga, inuanuabu kudi nkumba mu dibundulula ulela mu

                        Tshiongo.

Kasayi wa majiba mangi : Munkamba ne bilungula kua Beya Buanga, N’Fua wa

                        kudimona bu mu lumuenu ne kumuleja muanya.

Kasayi wa kuteesha dia nvita ; muetu mudi Tutenda tutooka biadi, muelela Kabundi

                        Muyenga.

Kasayi sée udi Nzolu wa tshitaala usàma uleja lutenga

                        Udi ngindu wa kufula nkasu ne miela ya kutapa, kusola ne kudima nayi.

Kasayi Tshitandayi wa bana milongulongu : kumukila ku Kabinda kuela mu Lusambu ;

                        beela lushiba mu Katako-Nkombe unvuila mu Lodja.

                        Beela ngoma wa lunkunvu mu Lomela ne Ndegesha bena nfumu bafuma

                        mu Luebo, kamanyi ne mu Kanzumba.

                        Beela ngoma mu Mushienga bena maja bajila mu Mueka, Tshibombu ne

                        Muena-Ditu; wa mu Kananga ne Tshikapa wela munkunduluilu.

                        Muetu muvua Kasanda ne Muamba batuuta nzeza, mu Kananga ne

                        mu Mbuji-Mayi balonga mushieetu!

Muetu mudi bongo ya mu dibindi ya kutemba ku bantu, badi kua Tshiaba

                        badinyamuna nayi, ya mu Boya-Mujika buanga, ku Nkatshia neya

                        mu kana nya kuela mu mpaya bua kuditeemba nayi.

Kasayi muimbimba kudi bana benda ba tungimba ne ba ntoya mianda: kudi Kabongo

                        Mbokodi, Kabasela ne Bukasa wa Ngandu, Kaboya malu ka ba Malumba,

                        Masengu kangimba, Mulumba Madikas, Tshiovu Kanyunyi ne Kabala,

                        Tshiala Muana, Bayuda ne Nsangalayi wabu, bonso buenu

                        Wabu kabayi mua mema kubala kumana.

Wa mu Kasayi wa muleja tshibonga; ne umuleja muela nuatapangana nenda.

Kasayi sée udi nvunda kabula bamadiba.

                        Wewa muina udi tshipepela kapepuila bena bintu.

                        Eyi mùona muanza N’kongolu lukanda nvula wa mudimbi!

Muana wa mu Kasayi mmulengela wa kuashila nvidie kuashila muabi, wa

                        dikoba dia mubidi disenuka bu dilaaba manyi!

                        Mulongi wa mukanda, muleeji wa njila ne wa nkuatshidi wa

                        mudimu muleenga.

Kasankidi nkanu, anu yeba mifula; mona bana beeba bakaadi beela milengu

                        bu nkuadi! Nkadi ndila bujindajinda mashi ne binsonji bipuekela

                        munda! Muena dibùa dienda wa popoodi bikoolu, muena diangala

                        dienda wa tshibudi bituuta.

Wa Kasayi ngaji kuimanyina apaapa; tshivu kutshibuila miombo mu tshondo.

Kudi wenu Ngandu Muela Kabengibabu; babu bakakuata nzolu wenda wa tshikuka

Batuula mulundu bua keedi mayi dimiinu dishila kashidi.

ngandukasala

Publicité
Publicité
Commentaires
W
Bidi muenya bee ni bidi binvuayija mubidi ni ngunvua nzolu wa tshitala usama munda. Bijinga kuikala neba ku tshibelu ni kuvuluka muinshi mua dibua muvuala kaputula ngoshela ngaji ni bilunga mu lusenga lufuimisha ni misekeleka.yawewaaaaa!!!!!! Yiyiyiyiyi bidi muenya beeeeeeeeeeee.
N
Ndi ne disanka dia bunyi bualu bua se,pa nga badi kasala aka,ndi mu pingana kwetu,ku Kasayi
Z
Tuasakidila wa bungi bua meyi a kasala. bidi bikengela se groupe umua wa ku kasai imba kasala sur Youtube.<br /> Mvidi Mukulu maweja anulame<br /> ZADIO
M
Ndi ngela Mr: Ngandu Muela Kabengibabu tuasakidila ya manza ntenta,bua kupeta kuanyi kua kasala kandi nmupeta mu internet ku bionso bidiyi musenga kuetu ku kasayi yonsu. Vraiment mutu wanyi udi usama ne mesu anyi adi apuekesha binsonji bua tshivua mumanya se,kuetu malu akala akamana kupita bualu benau bakamana kufua,kadi bitshidi anu koku bu mudi mifundu.Panuapeta commentaires yanyi ei, ndi musua bua nuenu nungandamuna bua mema nmanya tshidi mua kuenza.Yehowa anubenesha bonsu buenu pamua ne batufundidi bonsu. Kudi wenu:Albert Munda Mutoka Adelaide Australie du Sud.
AKEM asbl * Association Kasayienne d'Entre-aide Mutuelle (Tél.: +32498 685 870 / +32497 316 146)
Publicité
AKEM asbl * Association Kasayienne d'Entre-aide Mutuelle (Tél.: +32498 685 870 / +32497 316 146)
Derniers commentaires
Albums Photos
Archives
Publicité